كتب محمد قاسم | شو هالحكي
المثل اللبناني القديم ما ترك شي للصدفة وقت قال: «الأرتيست» بس يبصقوا عليها، بتمسح وجّها وبتقول: «الدني عم تشتّي»…
وهيدا بالضبط حال جماعة «السيادة تحت الطلب» بلبنان! طالع شارل جبور، الناطق باسم «الجمهورية القوية» وحارس هيكل السيادة بمعراب، وبكل فخر واعتزاز وصدر رحب، يبشّر اللبنانيين على الشاشات إنّه طلب من الرئيس جوزاف عون يسمّيه أوّل سفير للبنان بتل أبيب!
إيه يا أستاذ شارل، منصدّق! ومش بس منصدّق، كمان ما تفاجأنا أبداً! لأنو اللي بيقضي عمره السياسي والإعلامي يبرّر للعدو غاراته، ويطلع يخبّرنا إنو إسرائيل ما عندها أطماع بلبنان، ويبشّر اللبنانيين بأنّ السلام مع تل أبيب هو الضمانة الوحيدة لبقاء الرئيس بالقصر، ويقضي أوقاته بالتحريض على بيئة المقاومة واتهامها بتحويل المناطق لقنابل بشرية، طبيعي كتير يكون أقصى طموحه بالحياة كرسي بانتظار «موافقة أمنية» على باب سفارة بتل أبيب! فالمشهد ما عاد بدّه محلّلين سياسيين ولا قراءة بين السطور؛ المشهد بيحكي عن حاله: سيادة عالمنابر، وطلب وظيفة عند باب التطبيع!
بس السؤال: إنت وفريقك السياسي بعد إلكم عين تحاضروا بالوطنية والدستور والشرف العسكري؟
يعني صرلكم سنين فاقعين راس اللبنانيين بشعارات «الشرعية» و«الحياد» و«حصرية القرار» و«لبنان أولاً»، وفاتحين استديوهاتكم محكمة تفتيش يومية بوجه كل جنوبي حر دافع عن أرضه وعرضه… وبالآخر طلع كل هالصريخ مجرّد «مقابلة عمل» تمهيدية لوظيفة دبلوماسية عند المحتل؟ طلع كل هالضجيج عن «هيبة الدولة» مجرّد «سيرة ذاتية» (CV) عم تنكتب بالحبر الإسرائيلي لتتقدّم على شبّاك التوظيف بتل أبيب؟
لك روق أعصابك شوي يا أستاذ شارل، وخلّينا نفتح الدفاتر من كعب الدست:
وقت كان فريقك السياسي فاتح ثكنات التطبيع من الـ 1982 ومراهن على الدبابة الإسرائيلية لتوصله عالحكم، ووقت كان البعض عم يفرش السجاد للغزاة عالحواجز ويدلّهم عالقرى والبيوت، كان أهل الجنوب — هول الناس الأوادم الطيّبين اللي بتطلعوا كل يوم تحرّضوا عليهم وتسمّوهم «بيئة الدويلة» — عم يكتبوا بدمهم ودم ولادهم معنى السيادة الحقيقية اللي ما بتعرفوها إلّا بالبيانات!
أهل الجنوب يا شارل مش «تفصيل جغرافي» ولا «ورقة تفاوض» ترفقها بطلب التوظيف تبعك، ولا هنّي «جائزة ترضية» بتقدّمها أوراق اعتماد على طاولة مبادرات التفاوض مع تل أبيب!
أهل الجنوب هنّي الأرض، وهنّي العرض، وهنّي السنديان اللي ما انحنى لكل عواصف الغزو، وهنّي كرامة هالبلد اللي لولا صبرهم وصمودهم وتضحياتهم، ما كان بقي إلك ولا لمعراب وطن تعملوا فيه مؤتمرات صحفية ولا شاشات تطلعوا تنظّروا عليها!
الفلاح الجنوبي اللي بيقعد تحت القصف بأرضه بعيتا الشعب والخيام وكفركلا ومركبا والناقورة وبنت جبيل وصور والنبطية، وبيزرع تينه وزيتونه وتبغه بين الغارة والغارة، وما بيقبل يترك تراب جدوده لو تهدّمت الدني فوق راسه، أشرف بملّيون مرّة من كل صالونات الارتزاق السياسي اللي بتشوف بدم الشهداء «فرصة استثمار»، وبتشوف بركام القرى «جسر عبور» لتل أبيب!
الأم الجنوبية اللي بتودّع إبنها شهيد عالتلّة بالزغاريد والدمع الصابر حتى ما يفوت الجندي الإسرائيلي يدنّس تراب الوطن أو يمسّ عرض اللبنانيين، وبتوقف فوق ركام بيتها مرفوعة الراس ما بتمدّ إيدها لذلّ ولا بتطلب شفقة من سفارة… هيدي الأم هيّي تاج السيادة، وهيّي الدستور الحقيقي، وهيّي الشرف اللي ما بينشرى بملفات التطبيع ولا بوعود الموفدين ولا بوظيفة «سفير» عند قتلة الأطفال!
بس شو بدنا نحكي لقوم إذا شافوا طفل جنوبي تحت الركام بيفتّشوا عن «هوية أبوه السياسية» قبل ما يترحّموا عليه؟
إذا مقاوم وقف بوجه دبابة ميركافا عالحدود ليحمي أهله وأرضه وعرضه، بتستنفروا بمعراب وبتصرخوا «خرق للسيادة ومغامرة بالبلد»! وإذا صاروخ انطلق ردّاً على مجزرة بحق المدنيين، بتفتحوا دفاتر القانون الدولي وبتطالبوا بالمجلس العدلي! وإذا نازح جنوبي ترك بيته المهدّم بإجرام العدو، بتطلعوا تحسبوا عليه شربة الميّ وسقف المدرسة الرسمية وبتحكوا عن «تغيير ديمغرافي» و«ثقافة حياة»! وإذا طيران الاحتلال استباح السما والبحر والبر ودمّر القرى وحرق كروم الزيتون بالفوسفور الأبيض، بتغمّضوا عيونكم وبتقولوا «الدني عم تشتّي» و«إسرائيل ما عندها أطماع»! أمّا وقت يطلع مسؤول إعلامي بحزب يدّعي «السيادة» يعرض خدماته عالهوا ليشتغل «أوّل سفير بتل أبيب» فوق أشلاء الأطفال ودم الشهداء… هيدي فجأة بتصير «واقعية سياسية» و«وجهة نظر» و«عبقرية دبلوماسية»!
شو هالسيادة اللي بتشتغل متل «مكتب استقدام موظفين» عند المحتل؟ وشو هالوطنية اللي بتقيس الكرامة بسرعة الانبطاح وبوزن التنازلات؟ حتى الكهرباء اللي وعدتوا اللبنانيين فيها مع وزيركم بوزارة الطاقة، قطعتوها عن الناس لتوفّروا طاقة لكتابة طلبات التوظيف بالسفارات! المواطن اللبناني ناطر ساعة تغذية لبرّاد بيته، والمودع عم يفتّش على جنى عمره بالمصارف، والمريض ناطر الدواء، والجنوبي عم يحرس الحدود بدمه ورموش عيونه… وجماعة «الجمهورية القوية» واقفين عالدور ناطرين مين بيسبق ليوقّع عالتطبيع وياخد لقب «سعادة السفير»!
ولك بس نقول «عملاء» بتزعلوا؟! يعني إنتو بتختاروا العنوان، وبتكتبوا المضمون بإيدكم، وبتبصموا بالعشرة عالهوا، وبتقدّموا طلب الوظيفة علناً… ونحنا ممنوع نقرأ المكتوب؟!
يا أستاذ شارل، المشكلة مش بطموحك الوظيفي؛ الطموح حق مشروع لكل إنسان، ولو كان سقفه «موظف استقبال» عند عدو غارق بدم اللبنانيين والفلسطينيين. المشكلة إنكم بعد كل هالتسويق العلني للتطبيع، بتطلعوا آخر النهار تبيعوا الناس مراجل وعنتريات، وبتزعلوا إذا حدا سمّى الأشياء بأسمائها!
إنت وفريقك السياسي فيكم تحلموا بـ«سفارة تل أبيب» قد ما بدكم، وفيكم تكووا البدلات وتلمّعوا الصبابيط وتحضّروا خطابات التودّد للعدو من هلّق لآخر العمر… بس حطّوها حلقة بدينتكم: هيدي الأرض اللي ارتوت بدم الشهداء من الـ 1948 للـ 1982 للـ 2000 للـ 2006 لليوم، ما بتوقّع صكّ استسلام، وأهل الجنوب اللي كسروا «اتفاق 17 أيار» وأسقطوا مشاريع التطبيع بعزّ الاحتلال، مش رح يخلّوا تاجر مواقف يبيع ترابهم وعرضهم مقابل وظيفة بدرجة «سفير فوق العادة»!
غريب أمركم بلبنان والله… عنجد، يلّي استحوا ماتوا… والباقي كويين البدلات وناطرين أوراق اعتماد!
وبآخر الحلقة، منكتشف إنو «السيادة» عند جماعة معراب ما كانت يوماً مشروع دولة ولا دفاعاً عن أرض وعرض… كانت مجرّد «طلب توظيف» مؤجّل على شبّاك تل أبيب، والأولوية لحاملي بطاقة الولاء عند باب التطبيع!
#شو_هالحكي
