وكالة نيوز اخبار – مقالات – دراسات
مقالات مشابهة
سركيس الشّيخا الدّويهي -وكالة نيوز
كتب الإعلاميّ سركيس الشّيخا الدّويهي، معايدًا الأمين العامّ لحزب الله سماحة السّيّد حسن نصر الله بعيد ميلاده الثّالث والسّتّين:
اليوم عيد ميلادك يا أغلى البشر.
شو ما إكتب قليل عليك، وشو ما إحكي ما بوفيك حقّك.
بضلّ إيّام فكّر شو بدّي قلّك بهاليوم، وبصير فتّش ببحر اللّغة عن عبارات توصفك وتعبّرلك عن محبّتي إلك، بسّ صدّقني ما بلاقي.
ما في كلام بيعبّر قدّيش بحبّك، وبتباهى فيك، وبفتخر إنّي إبن من أبناءك وجندي من جنودك…
أنا بوعدك قدّام كلّ النّاس إنّي ما إخذلك، وما إتركك، وما إتخلّى عنّك لو شو ما صار.
رح حارب معك متل “وهب” و”جون” لآخر نفس، ولآخر نقطة دمّ…
ورح ضلّ حبّك متل “عابس” لآخر دقّة قلب، ولطلوع الرّوح…
أنا بوجودك ما بخاف من بكرا، ولا بقلق، ولا بيأس، ولا بكتئب، ولا بنهار…
أنا بوجودك بعرف إنّو كلّ مشكلة رح تنحلّ، وكلّ عتمة رح تزول، وكلّ ضيقة رح تنفرج، وكلّ حصار رح ينكسر، وكلّ معاناة رح تنتهي…
أنا بوجودك ما في شي بيهزّني، ولا في شي بيأثّر فيّي، ولا في شي بيكسرني، ولا في شي بيقتل جوّاتي الأمل، والحلم، والطّموح…
أنا بوجودك بعيش بكرامة، وبحسّ بالفخر، وبكتب بحرّيّة، وبنام بأمان…
أنا كرمالك بفرح بالإضطهاد، وبستمتع بالإهانة، وبتلذّذ بالإساءة، وبفتخر بالتّضحية… بتعرف ليش؟ لأنّي واثق إنّك على حقّ، ومقتنع إنّك الأفضل، ومتأكّد إنّك رح تنتصر…
ما بعمرك خذلتنا، ولا بعمرك خيّبتنا، ولا بعمرك قصّرت معنا…
فنيت عمرك كرمالنا، وضحّيت بأجمل إيّامك حتّى نعيش بأمان، وسلام، وطمأنينة، وعزّ…
معك عرفنا النّصر والتّحرير، وصرنا الأقوى والأفضل، وحقّقنا الإنجازات العظيمة، وصنعنا مجد لبنان…
ومعك رح نكمّل المشوار، ونرفع عكلّ قمّة راية، ونكتب إسمنا عجبين الشّمس، ونصلّي بالمسجد الأقصى وكنيسة القيامة…
كبرنا معك، وكبرنا فيك، يا أحنّ بيّ، وأعظم قائد، وأطهر سيّد، وأغلى حبيب…
العمر كلّه يا شيخ الشّباب، بالصّحّة، والخير، والقوّة، والنّصر…
وبإسم كلّ مسيحي حرّ وشريف بهالعالم بقلّك: الآب يحميك ويحرسك، والإبن ينصرك ويسدّد خطاك، والرّوح القدس يهديك القوّة والحكمة، ويلهمك عالخير، وينوّر طريقك…
بحبّك قدّ الدّني.
