هانز خليل

(للتأريخ وليس للتشبيح)

قبل أن امضي قدماً في هذه اليوميات، يجب أن انوٌه الى ان ما اكتبه هي أحداث عشت تفاصيلها بالحرف ولا اعمد الى تحليل أحداثها من وجهة نظري كما يفعل متصدروا الشاشات الإعلامية من واشنطن ولندن وحتى مراسلي الشاشات الحربيين والكثير منهم يبدأون حديثهم بعبارة أظن وأعتقد وهم في الواقع لم يروا بعيونهم إرهابي واحد ولا عايشوا نشوء بذرة المؤامره على سوريا وتشكيل الفصائل الإرهابية المسلحة ولاشاهدوا الدعم اللامحدود القادم عبر الحدود التركيه من السفاح عميل الناتو اردوغان واستخباراته؟.

أمضيت تقريبا ثلاثة أعوام من صيف 2012 حتى منتصف 2015 متردداً على المناطق الشمالية والشرقيه من حلب وشاهدت بعيني حاملات الدبابات القادمه من تركيا وشاهدت سيارات نقل الأموال المصفحه مرفقة بقوات عسكريه تركيه بألبسه مدنيه لحمايتها من السرقه وهي تنقل ملايين الدولارات إلى الفصائل الإرهابيه!. شهدت إستعراض القوه لداعش في بداية دخولهم لحلب ومرورهم برتل من حوالي سبعين سيارة تويوتا والمدافع المنصوبه عليها ومقاتليهم الملثمين المرعبين ببنياتهم الضخمه وكأنهم مستوردين من نوادي بناء الأجسام والعضلات!. بل حتى كان لي مواجهة معهم عندما حاولوا الاستيلاء على المطبعه التي اديرها بهدف طباعة منشوراتهم وكتبهم واشتكيت عليهم في محكمتهم الشرعيه التي انشؤوها على أنقاض مؤسسة الإتصالات في منطقة “الحيدريه” !.

كونت هناك صداقات وصلات مع بعض مسؤولي لواء التوحيد واستعنت بكتيبه مسلحه من اللواء نفسه لحماية المعمل من “المغتنمين” من ارهابيي ومخربي داعش والنصره!.

هناك تعرضت مرتين الى قصف بالطيران للجيش السوري كاد أن يودي بحياتي لولا ان في العمر بقية!. احدها كان في مدرسة المشاة عندما ذهبت الى هناك للبحث عن الشيخ حسن ليكون محامي الدفاع عني في محكمة داعش!.

في هذه اليوميات انقل هذه الأحداث والمشاهدات بشيء من الحياديه التي لا اجيدها دائماً ومع ذلك أتعرض للنقد والبعض يقول أنني ابرر للإرهاب والارهابيين مافعلوه!!!.

صدقاً توقعت كل شيء إلا أن اكون مدافعاً ومبرراً لهذه القذارات وهذه الحرب التي لم يحصل ان حدث في كل تاريخ العالم أن تآمرت أكثر من ثمانين دوله على بلد بحجم سوريا؟؟.

-(حصار حلب)

في شباط سنة 2013 تمكن الارهابيين من تطويق وحصار مدينة حلب بالكامل واستمر الحصار لآواخر ايلول لما تمكن الجيش من فك الحصار عنها بعد حرب شرسه جداً ومواجهه مع لايقل عن 5 آلاف ارهابي مدعومين بكل أنواع الأسلحة الثقيلة والحديثة، كتبت وقتها عن الحصار وفك الحصار منشورات كتيره راح حط بالتعليق الأول واحد منهم عن فك الحصار!.

المهم انو ماعاد في منفس لحلب إلا معبر “بستان القصر” يلي راح يبقى بذاكرة الحلبيين للأبد لأنو كان معبر الموت!. كان فيه قناصين محترفين ولاد شرموطه من الطرفين!.

كنت مضطر مرتين بالأسبوع اروح لطرف الأوباش عالمعمل بالشيخ نجار يعني اطلع السبت وأرجع الخميس عالبيت وانا وحظي يابرجع عمودي او افقي!. لأنو احياناً كان يصير اشتباكات بينهم والعالم بنص الطريق ومره حصلت وانا بالطريق لكن كنت قريب من طرف الدوله ونفدت لكن الضحايا والجرحى كانو بالعشرات رجال ونسوان كبار وصغار!.

صار المعبر هو مصدر التموين الوحيد لحلب يلي كان فيها حوالي مليونين ونص بني آدم!. كان ادخال الأكل من خبز وخضار وخلافه خاضع لمزاج الفصيل المسيطر على المعبر، كانو تلات فصائل يتناوبو عليه، الجيش الكر وداعش والنصره، كل فصيل اسبوعين، داعش والكر كانو يسمحو بالتموين لكن بشكل مقنن يعني ربطة خبز وحده وكيلو واحد من كل نوع خضار أما الوقود بنزين مازوت غاز والدخان فكان ممنوع منعاً باتاً ويلي يحاول يهربهم وينكشف كان يتعرض للضرب إذا كان شاب وللاهانه اذا كان كبير بالعمر او كانت مرا!. كان عندهم برميل جنب باب الخروج فيه نار مشعوله دائما يرمو فيه الدخان المصادر!.

النصره لما يجي دورهم عالمعبر كان ممنوع اتطالع أي شيء ابداً!. قال انو هي فتوى من شيخهم قياساً إلى حصار قريش للرسول مع انو بالدين مافي هيك شي بالمره ولو كان كانت داعش أولى بتطبيقه؟.لذلك أيام دور النصره كنا نموت من الجوع رسمي!. بحلب كان متوفر معلبات وطحين ومعكرونه وكل انواع البقوليات من عدس وفول وحمص الخ، لكن المصيبه مافي غاز ولاكهربا شلون بدنا نطبخ؟.

صار وقتها الناس تطبخ عالخشب وصار الخشب بكل انواعه من دف السحارات لدف الشجر ينباع بالكيلو او بالكومه حسب المتوفر وبعد فتره حتى الخشب انتهى واختفى!. بالبيت ياما خبزنا عالصاج بنار الحطب لحتى اضطريت مره اخلع باب المطبخ وكسرو وطبخنا عليه معكرونه وقتها وعملنا شاي بعدها لأنو محسوبكم مدمن عالشاي بشكل كبير، بس بتعرفو وقتها كانت اطيب معكرونه وكاسة شاي دقتهم بحياتي لأنو كانو على جوع وخريم!. تاني يوم صرنا نغازل باب الصالون انو مالو لزوم على طول مفتوح صيف وشتا؟.لكن وقتها تغيرو عرصات المعبر وتهرب غاز واشتريت جره بمبلغ 15 الف ليره وقتها كان الدولار تحت المية ليره يعني اكتر من 150 دولار!.

بالنسبه للسيارات تقريباً نسينا انو عندنا سياره مع انو كان يتهرب بنزين بس الأسعار فلكيه والبنزين كان تكرير يدوي يعني مابتعرفو بنزين الا مازوت الا كاز؟. كنت احياناً اشتريه لأنو اضطر لمشاوير بعيده؟.

أما عن الشتويه والبرد كانو كارثه علينا بكل ماتعنيه الكلمه!. تحت بتشوفو صورتي بأحد ايام الشتويه!. مابقي شي ماحرقناه لندفا، دف بلاستيك قناني الكولا الفاضيه ورق خرق؟. كنا نلبس كل شي بالبيت ونبقى بردانين مع ذلك؟.

هي ماحكينا بالقذائف يلي كانت تنزل علينا بكل مكان مابتعرف ايمتى؟.منطقة الجميليه سوق كبير كانو يقصفوه من بستان القصر، لايمكن يمر اسبوع إلا والضحايا فيها بالعشرات!!.

تلات سنوات لايمكن ينساها الحلبيين ابداً، كان الموت يترصدنا بكل زاويه ومفرق عدا عن الكهربا والمي المعدومه، المي كنا نعبيها من الآبار يلي من لطف الله كانت متوفره ونحمل البيدونات حارات وشوارع لنوصلها للبيت وكنا نتحمم بنص بيدون لكل شخص والمصيبه كانت بتسخين المي بالشتويه؟. ماعاد نهتم اذا طلعت ريحتنا وبقينا اسبوعين بلا حمام عادي كنا نقول نحنا بحرب بكرا بتفرج؟….. انتهى

-(ابني عسكري)

في سنة 2013، كانو الاوباش محتلين مناطق شرق حلب والمدينة الصناعية في الشيخ نجار، وقتها كنت مجبر اطلع للشيخ نجار مشان ماحدا يسرق المعمل وحتى شغلت المعمل بناء على نصيحة “ابو الوليد” لأنو حسب ماقال اذا كان شغال ماحدا بيطمع فيه!. “ابو الوليد” (بالنسبه للأصدقاء الجدد) كان قيادي في لواء التوحيد وضابط ارتباط بين اللواء وباقي فصائل الاوباش من داعش والنصره وغيرهم، ربطتني فيه معرفه واتطورت لصداقه وسهرات مع بعضنا فيها كاس وطاس وهيك قصص، لولاه كان طار المعمل من اول يوم!. (مع انو طار بعدين)!.

في يوم كنت جاي عالمعمل، بشوف زلمه بالخمسينات واقف على باب المعمل، سألني:

_ السلام عليكم، حضرتك ابوعمر؟

_ عليكم السلام، اي نعم امرني

_ العفو، على راسي ابو عمر داعيلك بالخير ابو سالم بدي ياك بحديث خاص

_ اهلاً وسهلاً تفضل نحكي جوا

_ لأ دخيلك مابدي حدا يشوفني بس “سامر” العامل عندكم جاري بالبنايه حكالي عنك قلت بلكي بتساعدني؟

_ اذا بيطلع بايدي من عيوني، وصرنا نتمشى سوا على الطريق قدام المعمل وقال:

_ انا عندي ابن عسكري عم يخدم بحوران، لما دخلو (الثوار) على حارتنا مدري مين دلهم انو عندي ابن عسكري؟،دقو علي الباب تلاته من كتيبة “استقم كما امرت” _ كتيبة “استقم كما امرت” كانت تتلقى مئات آلاف الدولارات شهرياً عدا السلاح من قطر وكانت مهمتهم مطاردة أهالي العسكريين والحزبيين وموظفي الدوله وارغامهم على الانشقاق _معهم واحد متل الفيل الله وكيلك حتى اسمو ابو غضب وهددني اذا ابني ما انشق بعد اسبوعين بدو يدبحني قدام عيلتي!!.

_ وانت شلون بدك تشقو لابنك ماعم افهم؟.

_ الله وكيلك يا ابو عمر مابعرف شي عن ابني، آخر مره حكى معي من شهر

_ طيب قلهم هالحكي؟

_ ماصدقوني قال خلي مرتك تطلع لعندو تهربو وانا اسمي على حاجز بستان القصر اذا شافوني معهم امر يقوصوني بأرضي!.

_ لاحول ولا قوة الا بالله، طيب بشو بقدر اساعدك يا ابو سالم؟ انا مابعرف حدا لا من استقم ولا من انطعج؟

_ بعرف والله قالي سامر انو مانك معارض، بس بعرف علاقتك مع ابو الوليد قويه بلكي بهربني من الحاجز انا وعيلتي لمنطقة النظام؟.

_ طيب ابو سالم توكل على الله واذا صار بعدين سألك ابو الوليد قول انك ابن خالتي بلكي على يدك منفوت سوا على بيت خالتنا.. وفقعنا ضحكه سوا.. ودعني وراح.

تاني يوم كنت سهران مع ابو الوليد وحكيتلو القصه، قال هالايام احرار الشام ماسكين حاجز بستان القصر نحنا دورنا اسبوع الجاي بهربلك ياه ولايهمك.

يوم السبت اتفقت مع ابو الوليد ننتظر ابو سالم بساحة الكلاسه، وفعلاً شفتو من بعيد مع مرتو وتلات اولاد صبيين وبنت، قال ابو الوليد:

_ انت لاتمشي معنا لأنو عرصات الشام عندهم جواسيس بالمعبر حتى ماتتورط بالقصه!.

راح ابو الوليد وسلم عليهم على اساس قرايبهم وحمل معهم الشناتي، انا بقيت على مسافة خمسين متر عنهم، وصلو عالحاجز يلي كان عليه عناصر ابو الوليد صاح عليهم:

_ هاد قرايبي ساعدو

_ امرك معلم، تفضل حجي روح الله معك.

مرق ابو سالم وعيلته وطلعت بعدو، التقيت فيه على حاجز الفيض عند الجيش السوري، كان في تفتيش هويات لما شافني ركض علي ونزل تمجيق وبوس فيني:

_ الله يوفقك يا ابو عمر ويحميلك ولادك كنت تبهدلت هدول مابيعرفو الله

_ موفق ابو سالم انا لهون خلصت مهمتي اذا عليك مشكله هون وحياتك مابعرف شرطي بالحكومه

_ اعوذ بالله يازلمه، واشّر بايدو على العساكر وقال: هدول ولادنا مشكلة ايش، لك شوف هالوجوه ما احلاها؟ هدوليك وجوهم بتقطع الرزق خاصة الفيل ابو غضب، يازلمه عيونه عم تقدح لؤم وشر!.

عساكر الحاجز كانو مغبرين معفرين مسودين من الشمس والواحد منهم يمكن من شهر مو متحمم بس الواحد لما بشوفهم روحه بترجع وخصوصاً لما بكون طالع من مناطق الاوباش!.

ودعت ابو سالم يلي كان رايح لعند قريب الو ساكن بالحمدانيه..

متل ابو سالم كان فيه الاف بحلب وبغير حلب!. في كتير عساكر وضباط انشقت بسبب تهديدهم بأهاليهم واكيد انتو بتعرفو كتير هيك قصص؟؟؟..

-(ابو حسن)

كان في شاب باواسط التلاتينات بشتغل مؤشر عدادات بشركة الكهربا، كان يجي لمعملنا ياخد التأشيره وكنت اكرمو بمبلغ بسيط وكاسة شاي بالشتا وحملو قنينة مي بارده بالصيف، الغريب انو كان انيق بالنسبه للمهنه يلي كلها غبره وعفره!. استمر الحال سنوات وصار ود بينا وكان دائما يعرض علي خدماتو انو بدو يرد المعروف يعني؟.

راحت الايام وراح المعمل معها وصفقتنا عواصف الحريه .. صار حالنا متل اذا كنت مجمع لوحه “بازل ” على سجاده واجت مرتك نفضتها !!!..

بيوم كنت راجع للبيت بالميكرو على طريق معبر “بستان القصر” على الطريق بمنطقة الصالحين وقفنا حاجز الاوباش وطلبو الهويات جمعوها واخدوها للمعلم بعد شوي المعلم اجا طاير للميكرو وهو عم يصيح عمي ابو عمر وينك وهجم علي ونزل فيني بوس وخنقني بريحتو

_ ماعرفتني عمي ابوعمر ؟؟.

_ بلا زغره لأ!.

_ لك انا ابو حسن وشال من على راسو الجمدانه ومع ذلك ماعرفتو!.مسكني من ايدي ونزلني من الميكرو وصاح بالسائق :

_ روح شيخ اتكل

_ يا ابو حسن هلق بتأخر وبيسكر المعبر

_ ولايهمك بفتحلك ياه خصوصي !!..

سحبني لغرفه بمدرسه وطلب شاي، ذكرني بحالو هو نفسو مؤشر العداد مع بعض التعديل البسيط لزوم الثوار يعني، كانت ريحتو بارفان صارت تيوس، كان ابيض صار كحلي من الشمس كانت دقنو بتمرر عليها قطنه مابصير تعلق هون راح توصل لصرتو!. بلا طول سيره سألت:

_ ليش هيك عامل بحالك ؟؟.. نفخ نفخه بتطبخ طبخه وقال :

_ اه ياعمي ابو عمر تبهدلت بهدلة الكلاب، وطلع فيني بشوية ارتياب وسألني انت شو؟!..

فهمت قصدو بس خفت بصراحه ليكون قابضها عن جد وينزلني عالقبو، حاكم بهالزمن الاخوه نتفت بعضها!. حطيت ايدي على كتفو وقلت :

_ فضفض ابو حسن بيناتنا خبز وملح وشاي ومي بارده انا مابنسى الود ولو، حسيت انو ارتاح لما ذكرتو بهديك الايام وشعل سيجاره وشفط شفطه طارت نصا

_ عمي ابو عمر تورطت ومابعرف شلون بدي اخلص؟.بالبدايه قلنا العالم كلها عم تتظاهر ياولد اطلع معهم مشان ما يؤذوك ولما هالمناطق صارت تحت سيطرتهم صار بدهم حدا يقرا ويكتب، جردلنا هي ابو حسن خود هي جيب هي وكل هالوقت وانا عم اقبض راتبي كل شهر من شركة الكهربا لحتى صار يوقفو الناس المتورطه عند الرواتب خفت وماعاد نزلت اكيد انا مطلوب هلق؟. متل مابتعرف فاعلين الخير عنا كتيرين وطار الراتب واضطريت كمل معهم لوصلت لهون، هربت عيلتي لبيت اخوي بمناطق النظام هون مافي امان كل فتره بيشتبكو مع بعض عالمسروقات ونحنا علقانين بينهم

_ طيب روح لهونيك بجوز مانك مطلوب شو بدك بهالبهدله ؟؟..

_ ياريت عمي ابو عمر والله انا ماعملت شي ولا حملت سلاح بس لانو قرايتي كويسه عطوني اسماء قال انو شبيحه مشان فتش عليهم ولو اعرف الشغله تفض معي بشهرين تلاته توقيف هلق بسلم حالي بس بجوز يعدموني ماحدا بيعرف؟! بتعرف شي حدا يطلعلي؟..

_ صدقني مابعرف بس عم تصير مصالحات لناس شالت سلاح انت شغلتك بسيطه

_ على كفالتك؟.

_ لأ دخيلك هيك بتوقع بس ما بكفل شي

ودعني مع بوسات متل كاسات الهوا وماعدت شفتو ضاع شادي؟.

-(منظمات انسانيه)

قاد بدايات المؤامره على سوريا أفراد من منظمات المجتمع المدني يلي فرخت بسوريا بعد الانفتاح على العالم في سنة 2003 , هالمنظمات يلي صارت بالعشرات تحت مسميات عديده شي حقوقيه حقوق المرأه الطفل حق التعلم حق التعريص الخ وشي انسانيه وشي للتطوير والتنميه والجوده ومقاييس الايزو!. في سنة 2009 بلغ عدد هالمنظمات في حلب فقط 38 منظمه وكانو يختارو من بعض المنتسبين ناس معينين ويبعتوهم دورات خارجيه سموها “دورة صقل مهارات”، وكانو يختاروهم من الناس المتيمين بالقيم الغربيه وعندهم شخصيه جذابه وشيء من المنطق بحديثهم!.

اذا حدا بدو يسأل عن السلطه وين كانت وبتعرف إلا مابتعرف خطورة هيك منظمات؟. السلطه كانت شريكتهم ودخول البلد حتماً عن طريقها لأنو كانت تمنحهم التراخيص اللازمه لعملهم وتأمنلهم مقرات وموظفين يساعدوهم!. لكن يبقى السؤال الأهم: هل كانت السلطه مطلعه على خلفيات عملهم وخلفيات العاملين الأجانب فيها؟. انا ماعندي جواب لكن بعرف انو الراحل حافظ الأسد كان يعارض بشده دخول أي منظمه لسوريا وحتى منظمة الايكاردا عانت جداً للحصول على ترخيص واشترط عليهم يكون ثلثي العاملين فيها من السوريين!.

الموضوع ما اقتصر بس على التدريب داخل سوريا بل كان في ناس تدرب بالسعوديه وكتبت عنهم مره ورابط المنشور في التعليق الأول!.

أحد مشاهير خريجي هالمنظمات يلي صار اسمهم ناشطين سياسيين بعد اندلاع المؤامره وحده كان اسمها “مارسيل شحوارو” (في الصوره) وهي كانت تكتب بإيدها يافطات المظاهرات تبع يوم الجمعه، وعلى فكره علناً وتحت أنظار كل الفروع الأمنيه، كان بيتها بالعزيزيه بحلب وتروح على “جسر الحج” مقر توار الحريه وتكتبلهم اليافطات!. أحد المرات بعد ماصدرت الأوامر الأميركيه بأسلمة (الثوره) كانت عم تكتب يافطه بالشارع تحت جسر الحج، بتجي دوريه من جيش المجاهدين وبتقلها انو لازم تتحجب هون مابصير تطلع المرا بدون حجاب!. انزعجت الخانم وبلشت تلقي عليهم محاضرات انو نحنا عملنا ثوره مشان الحريه والعلمانيه والكبه بسفرجليه!. المهم شحطوها عالمقر وخلوها توقع على تعهد انو تتحجب!. وراحت شحوارو وكتبت على صفحتها عالفيسبوك بيان تطالب فيه المسيحيين بالهجره لعدم قدرتهم على التعايش مع الفصائل المسلحه، هاد اصلاً كان أحد مهامها وسافرت بعدها لفرنسا وهونيك فتحت بسطه اسمها “منظمة كش ملك” اقتصر دورها على النباح على الفضائيات المعاديه!.

من مشاهير هالمنظمات كمان المقبورين “رائد الفارس” و “حمود الجنيد” يلي اتدربو على يد CIA في السعوديه وتم اغتيالهم من مجهولين في ادلب ونعاهم طرامب بنفسه وقتها!

بعد أوامر أسلمة الثوره في نهاية 2012 تقريباً، انتهى دور الناشطين يلي دربوهم على التحريض وجمع المعلومات وتنظيم المظاهرات تارة بالتحريض وأغلب الأحيان بدفع مبالغ نقديه للمتظاهرين بدأت بألف ليره للمتظاهر وانتهت بتوزيع صندويشات فلافل عليهم، تم تسفير معظمهم لدول اجنبيه وبقي منهم بس الاعلاميين يلي كنتو تشوفوهم على شاشات الجزيره والعربيه وغيرهم، الفصائل يلي على اساس تسلحت لتحمي الشعب السوري وكانت شعاراتهم عم تشرشر علمانيه وحريه وديمقراطيه، تحولت كل الشعارات والرموز لإسلاميه(في الصوره)!.

اهم إنجاز المنظمات على الإطلاق هو كسر هيبة الدوله والخوف عند الشعب من الفروع الأمنيه لأنو بعدها صار الشعب جاهز للسوق محل مابدهم أبواق الفتنه والفوضى والتحريض؟!!.

طبعاً أسلمة الثوره كان بسبب المضي في مشروع الشرق الأوسط الجديد يلي عرقل انطلاقته إنتصار حزب ربنا في 2006 !. وقاحة اميركا وعنجهيتها تجاوزت كل الحدود وصارت تعلن عن مشاريعها بكل وقاحه والشرق الأوسط الجديد هم من اعلنو انو تقسيم جديد للمنطقه على أسس طائفيه وعرقيه ومشان هيك كشفو عن وجه المؤامره الحقيقي بسوريا وأمرو بالأسلمه بدل شعارات الحريه والعلمانيه والديمقراطيةيلي خدعو فيها العالم ببداياتها!.

أسلمة الثوره ما اقتصر بس على الشعارات بل طال كل أشكال الحياة في المناطق المحتله من سوريا!. اللحى الثوريه الغيفاريه الخفيفه تطاولت الى لحى سلفيه، حتى انو صاحب اللحيه الخفيفه صار يعامل باحتقار واختفت مع الوقت بنطلونات الجينز لباس الثوار التقليدي وصارت عسكريه مموهه او كلاليب قاعديه قصيره!. تخيلو ياجماعه انو حتى أدبيات التخاطب بين الناس تغيرت واختفت عبارات متل يا اخ يا استاذ يا سيد الى كلمه وحده وهي ياشيخ!!. تعا ياشيخ بكام البندوره شيخي قرٌب ياشيخ روح ياشيخ وهكذا؟!!.

مو بس هيك، مئات من الدعاة والمشايخ والأئمه جابوهم من كل أنحاء العالم وصارو يخطبو بالمساجد عدا عن المجاهدين يلي جمعوهم من كل العالم، كل هاد لخلق بيئه متطرفه لتبرير التقسيم الطائفي!.

كان الي هونيك تجربه مره في صلاة الجمعة بالحيدريه ولقاء مع مجاهد أذربيجاني بحكيلكم عنها بكرا…

(صلاة الجمعة في “قندهار” الحيدريه)

حكيت بالمنشور السابق عن أسلمة الثوره، خلال شهور قليله تحولت المنطقه إلى قندهار حقيقيه!. لو قدرت اصورلكم شوية مشاهد منها لايمكن تصدقو انو من حلب؟. النسوان اختفت بالمره من الشوارع وصار ممنوع تمشي لوحدها بلا محرم!. الرجال كلهم بلحى وممنوع حلق اللحيه اصلاً؟. لدرجة صرت اخاف أدخن بالشارع من خوفي من شي دوريه لداعش وصرت اخفي الباكيت بجرابي تحسباً!.

كنت بالعاده ارجع للبيت بمناطق الدوله يوم الخميس الصبح واطلع يوم السبت مره تانيه لكن احياناً يصير ظروف خاصه متل اغلاق معبر “بستان القصر” مثلاً او اشتباكات عالطريق بين الاوباش اضطر بهيك حاله ابقى بالمعمل لتاني يوم يلي هو الجمعه وبهيك حاله المفروض صلي الجمعه معهم لأنو اذا حدا وشى عني انو ماصليت الجمعه جماعه راحت علي وخصوصاً لما دخلت النصره وداعش للمنطقه؟.

احد المرات صليت بالحيدريه، دخلت الجامع وقعدت في الصفوف الخلفيه لأنو الجامع مليان مؤمنين مو مؤمنين حياالله تقولو صحابة رسول الله؟. يعني الكافر فيهم طول لحيته 3سم وكلابيات معظمها قصيره وانا يادوب دقني نص سم وتحتها بنطلون جينز كمان؟. حسيت حالي من يهود بني قريظه!. شوي بيقعد جنبي شيخ بحدود الستين كان ضخم بلحيه رماديه ضخمه طويله ومفروشه على صدرو وحواجب غزيره ومقفوله ونظرات؟. يعني لو نظر على ولد صغير راح يبقى يبكي من الرعبه ليصير عمرو 18 سنه؟. الخطيب كان شيخ كويتي مستورد مخصوص في حملة التحريض على الجهاد وتدمير البلد وكان ذو مظهر حسن وصوت رخيم وبصراحه كان مقنع جداً!. يعني لو صدف اني صليت عندو مرتين تلاته كنت اليوم اقل الشي “ابو الدرداء الحلبي”!.حديثه معظمه كان ايات وأحاديث وقصص من السيره النبويه والمصلين كل شوي يصيحو تأثراً الله اكبر وكل ماذكر الرسول يردو وراه صلى الله عليه وآله وسلم وانا ساكت والشيخ جنبي كل شوي يزورني وماكنت افهم ليش؟. افتكرت لأنو دقني قصيره او لأنو لابس جينز!. المشكله مافيني اسألو لأنو الحكي اثناء الخطبه فيه مفسده للصلاه؟. لحتى التفت علي بالآخر لما جاء ذكر الرسول وفنجر عينيه وصاح بوجهي وهو عم يهز ايديه الضخمات قدامي صلى الله عليه وسلم!. الله وكيلكم فلجني رعبه بس فهمت انو لازم قول معهم صلى الله عليه وسلم؟. يعني لو يقدر يحكي كان قلي: انو جاي بدون لحيه وبالجينز وكمان ساكت ياكافر يامشرك ياعدو الله؟. لما فهمت عليه ومن خوفي ليكون شي امير بالنصره او داعش؟. صار صوتي اعلى صوت بين المصلين، تقول صرت مضخم صوت لوحدي، مو بس هيك كنت اكمل التسبيحه كمان يعني الناس تقول صلى الله عليه وسلم وانا كمل لوحدي وعلى آله وصحبه أجمعين صرت ولي من اولياء الله من الرعبه!.. ولما خلصت الصلاه،بعد الصلاه بيصلو ركعتين مابعرف ليش بس المهم تركت الشيخ وهو ساجد وانسليت وهربت بأول ميكرو طلع بخلقتي!. بصراحه خفت يفحصني بعد الصلاه ويسألني عن شغلات بالدين؟. اصلاً اسمي لوحدو شرك بالله!!.

(خطبة الجمعة في “قندهار” الحيدريه)

المنشور السابق راح الحكي كله على الشيخ الداعشي وماحكيت عن خطبة الجمعة يلي سمعتها من الشيخ الكويتي الجليل يلي على اثرها كنت راح صير “ابو الدرداء الحلبي”!.

الحقيقه الامام كان مقنع ومنطقي جداً وقال بما معناه انو المغفره درجات عند رب العالمين يعني لما الواحد بموت موت طبيعي توضع حسناته في كفه وسيئاته في كفه ويلي بترجح بتقرر مصير الانسان؟. والعقوبه مؤقته بجهنم طالما الرجل توفي على دين الإسلام؟. لكن اذا الواحد راح حج قبل مايموت لاتُغفر كل ذنوبه!. قال انو رب العالمين راح يسامحك بحقوقه هو فقط يعني الصلاه والصيام وبعض الاثام الاخرى كشرب الخمر؟. اما حقوق البشر وحتى قتلك لعصفور دون وجه حق _قال وقتها حديث عن العصفور ما انتبهت عليه لأنو الشيخ جنبي انبحت فيني وقتها ورعبني ليش ماعم قول صلى الله عليه وسلم _ فستحاسب عليه حساباً عسيراً؟.

هون صاح بصوت عالي ومرتجف من فرط التأثر وقال أما ان تموت مجاهداً في سبيل الله معلياً رايته وناشراً لدينه فقد غفر الله لك ذنوبك اجمعين ولو كانت ملئ البحار؟. هون دب الحماس بالمصلين وصاحو الله اكبر لا اله الا الله!. يعني لو ساعتها تطلع قدامهم حاملة الطائرات “روزفلت” كان قطعوها بأسنانهم؟. لك نسيت هدول الاميركان صحابهم؟. قصدي لو طلعت قدامهم البارجه النوويه الروسيه “بطرس الاكبر” كان قرطوها متل الجزره؟.

واكمل الشيخ وصف الجنه الموعوده للشهيد والمرتبه الاولى مع الأنبياء في الصف الأول يعني هدول يلي عم تشوفو صورهم وترتعبو منهم راح يقعدو جنب الرسول والصحابه فوق وحتى راح يرفعو التكليف بين بعضهم لأنو صارو بمرتبه وحده؟. يعني ابو قتاده الحلبي راح يسلم على ابو بكر الصديق ويقلو شلونك ابو قحافه شلونو ابنك عبدالله ماشفتو معك كني فرزوه على غير جنه ؟. وابو زيد الادلبي راح ياخدو بالحضن لسيدنا عمر بن الخطاب ويقلو علي الطلاق اشتقتلك ولوو ابو عبدو على قد ماسمعت عنك؟. هيك شي يعني حسب مافهمت؟.

وبعدين دخل على الجزء المهم الحوريات واشكالهم وجمالهم ومافيك تميز ايهم اجمل من الاخرى؟. هون شطت ريالة الشباب وانفرجت اساريرهم وصارت اللحى الطويله ترجف؟. يعني لو الشيخ مكفي كمان جملتين وحكى مثلاً عن “اللانجيري” يلي لابسينو والفخاذ وهيك قصص كان انتقض وضوئهم!!. بس اهم بند انو كل واحد راح يعطيه رب العالمين قوة اربعين رجلاً لا فياغرا ولابطيخ فيلم سكس ابدي، جنبهم نهر من الخمر لاغَوْلَ فيه؟. يعني خمر بلا كحول ليش ماعرفت؟. كان سموه عصير عنب ليش يسميه خمر ولاغول فيه؟. خيو هي شغلات ربانيه مابفهم فيها؟. المهم الشباب عم تشرب خمر وتقرط حوريات وقال انو الواحد اذا جاع بيحضر قدامو الطعام يلي مشتهيه بدون مايطلب حتى؟. مثلاً كبه بلبنيه يبرق محاشي اذا كان حلبي وحراق اصبعو اذا الشهيد شامي، خفافيش وجراد مسلوق إذا كان صيني وهكذا؟. ولمح شي عن الغلمان يمكن مشان المجاهدين يلي من ادلب لأنو في منهم مابيشترو الحوريات بفرنكين؟. بس ماقال انو الغلمان للقرط كمان!. قال معهم صواني وكاسات يطوفون بها؟. بس اظن مافي مشكله حسب مافهمت لأنو كل شي لخدمتهم وامتاعهم يعني اذا قرطو الغلمان وين المشكله ؟. شهداء هدول مو داخلين بشهادة حسن سلوك من عند المختار؟. بعدين هي قصة مليت من هالحوريات بعد الفين سنه مثلاً مو وارده ابداً لأنو الحوريات نفسهم (تراهم كل يوم بعيون اخرى) مافهمتها هي؟. بس يمكن قصدو بصير تبديل آلي قبل ما الواحد يمل؟.

بعد الخطبه، اظن الشباب طلعو من الجامع على شعبة التجنيد مالحقت اعرف لأنو كنت هربان من الشيخ ليخطرلو يجاهد فيني ويطلع على كتافي لفوق؟….

(عبد الرحيم الأذربيجاني)

حلب من أشهر مدن العالم بأطايب الأكل فيها، وهاد طبيعي جدا في مدينه من أعرق وأقدم مدن العالم يلي كانت محطه مهمه على طريق الحرير لآلاف السنين وتلاقح الثقافات فيها أنتج حضاره لاتضاهى، يعني الأكل الحلبي مو اختراع خاص بالحلبيين وإنما عصاره وزبده من كل مطابخ العالم من الصين للهند وصولاً للمغرب!!.

حتى لو ماكنت جوعان اذا مريت جنب بسطة شوي او عربة فلافل راح تشط ريالتك وتجوع وتاكل!. القصه انو عندهم فن بتزيين عرباتهم وخضارهم لتصير متل لوحه شهيه بالإضافه لتعمد إثارة روائح الشوي وقلي الفلافل وروائح سقسقة صندويشات السجق والشاورما وقاوم إذا فيك؟.

في احد الأيام وقعت بفخ عربة فلافل بسوق الحيدريه الشعبي، أنا عم انتظر صندويشتي اجا شخص بملامح آسيويه وصار يسأل بالاشاره انو شو هاد؟. لاحظت انو عم يحكي كلمات تركيه وهي لغه بعرفها لأنو درست بتركيا، سألتو:

= حضرتك منين؟. ارتاح وقال

_ الحمد لله اخيراً شفت حدا بيفهم علي

= نحنا عندنا كتير تركمان بس ساكنين على بعد كيلومترين من هون بحي اسمه الهلٌك

_ اشو هاد الأكل ريحته طيبه كتير!. هون طلبلتله صندويشه تكون مدعومه وقلت:

= هاد اسمو فلافل هلق دوق وشوف طلبتلك صندويشه على حسابي، صار يتشكرني كتير وصار يناديني “آبيه” يعني بالعربي اخي الكبير وهاد لقب احترام بين الاتراك وهون سألته:

= حضرتك منين؟.

_ انا من أذربيجان!. عملت حالي غشيم وسألته:

= جاي سياحه لسوريا؟.

_ لأ انا مجاهد

= بأي فصيل حضرتك؟.

_ انا بجبهة النصره

= عم يدفعولك راتب إلا مجاهد في سبيل الله؟. تبسم وقال:

_ طبعاً انا مجاهد في سبيل الله بس عم يعطوني 200 دولار بالشهر مصروفي بس انا عم ابعتهم لعيلتي بالضيعه وقبل ما اسافر الشيخ عطاني 500 دولار مصروف لعيلتي بغيابي _ هو ذكر المبلغ بالعمله الأذربيجانية “مانات” لكن عالدولار بتعمل هيك مبلغ تقريباً_

= بس مو قليل 500 دولار مابتعمل شي؟.

_ لا مو قليل عندنا بالضيعه بتعمر بيت منيح مابيكلفك الفين دولار!.

اكلنا الفلافل وأبدى اعجابه الشديد فيه، تشكرني كتير وافترقنا ونسيت القصه!.

بعد حوالي تلات او اربع شهور، كنت واقف بالحيدريه عم انتظر ميكرو المدينه الصناعيه، بتمرق دوريه لداعش من الطرف التاني للاوتوستراد، واحد منهم صار يطلٌع فيني، طبعاً الدواعش كلهم ملثمين مافيك تتعرف عليهم!. انفلجت من الرعبه وعملت حالي مو شايفهم واجتني مكالمه عالموبايل، طالعت الموبايل من جيبي وصرت مثٌل انو عم رد عالمكالمه، بس طرف عيني عليهم، دارو ورجعو لعندي وانا سلٌمت امري لله وصارت دقات قلبي ألف!. بينزل واحد منهم وانا داير ظهري، بيحط ايدو على كتفي وبقلي:

_ ناصل سن آبيه؟. يعني بالعربي شلونك اخي؟. التفتت وقلت:

= الحمد لله وأنا مستغرب!. هون شال اللثام وقال:

_ ماعرفتني؟. انا عبد الرحيم الأذربيجاني!.

فتحت ايدي لأقصى مداهم وهجمت عليه لفيتو وبوستو كأنو صحبة عمر ومو شايفو من سنين وقلت:

= يازلمه خفت افتكرت حالي عامل شي؟.

_ حقك علي انا كتير بعتذر منك، حط ايدو على صدرو كعادة الأتراك لما بيتأسفو عن شي وقال نحنا عالم مامننسى الخبز والملح

= وخصوصا لما بكون معهم فلافل!. فقعنا ضحكه وسألتو:

= طمني عنك انشالله امورك تمام؟.

_ الحمد لله كل شي تمام، وباس ايدو وجه وقفا وحطها على جبينه تعبير عن الرضا

= انت كنت مع جبهة النصره شايفك اليوم مع داعش!.

_ اي هون بيدفعولنا 500 دولار بالشهر والأكل على حسابهم

= مسموح تنتقل هيك؟.

_ مو بس انا انتقلت في كتيرين انتقلو وبالنهايه كلو جهاد في سبيل الله!.

ودعني وراح على امل يشوفني بعدين بالصدفه لأنو بداعش ممنوع الاختلاط مع المدنيين بس هو كان بدوريه كل عناصرها رفقاتو من أذربيجان ومعهم تركماني سوري مترجم لذلك قدر يسلٌم علي؟!.

معظم الارهابيين الأجانب على شاكلة عبد الرحيم، ناس من قرى نائيه مسحوقه بالفقر سواء من أذربيجان او الشيشان طاجيكستان وحتى الايغور الصينيين!. محركهم الوحيد هو المال فقط!. للأمانه مافيني انكر دور العقيده يلي شوهوها بمال البترودولار على مدى عقود طويله بدأت من سبعينات القرن الماضي، لكن يلي متل عبد الرحيم بعمرهم مو سامعين بسوريا ولاحتى بالدولار، اصلاً عبد الرحيم كان يقول عنو دونار!!. هدول ناس بسطاء جداً وطيبين وعلى سجيتهم لأبعد الحدود وصارلهم فرصه ليحسنو وضعهم المادي بالحلال _ حسب مفهومهم وقناعتهم _ ليش مايستغلوها؟. وكلكم شفتو السوريين أنفسهم كيف تحولو لمرتزقه عم يقاتلو شي بليبيا وشي بأذربيجان اليوم؟.

لذلك طالما لازالت عوائد البترول عم تصب في خزائن اميركا والغرب راح تبقى الحروب والصراعات والمشاكل بالعالم لعقود طويله؟. الغرب وأميركا طالما ماعم يطلع شي من جيبتهم ماعندهم مشكله تحترق كل البشريه وتتشرد وتجوع!. واليوم مع ازدياد البطالة والفقر بالعالم اضعاف عن الماضي، دائماً راح يلاقو مرتزقه غب الطلب!. عند لقمة العيش وسبل الحياة لاتحكيلي عن الاخلاق والدين كله ينهار إلا ان تكون نبي!!. مشان هيك بشدد دائماً على انو قطع يد الهيمنه الغربيه على بلادنا وامتلاك ثرواتنا وارادتنا وتقرير مصيرنا بأنفسنا هو الطريق الوحيد لخلاصنا!..

(ابو سامر الشبيح)

ابو سامر انسان عصامي ابتدأ حياتو من الصفر وقدر يأسس معمل فلاتر “الشمس”.. وهي فلاتر وقود وهوا للسيارات والماكنات وهيك شغلات.. الماركه كانت مشهوره ومعروفه بحلب والمنطقه الشرقيه لأنو بضاعه جيده بمواصفات عالمية لأنو ابو سامر كان زلمه صاحب ضمير مهني مابيرضى يطلع من معملو الا انتاج سليم 100% وكان يتلف فلاتر مكلفه بس لمجرد عيب تافه غير مؤثر حتى؟!.

بدأ حياته المهنيه بورشه صغيره في منطقة “عين التل” بحلب وبسبب جودة النوعيه صار طلب كبير عليه وتوسعت الورشه لمعمل صغير فيه حوالي 25 عامل وعامله، عرفني عليه صديق لأنو كان بحاجه لتركيب كاميرات مراقبة للمعمل وكنت اشتغل فيهم وقتها؟. يمكن ابو سامر الصناعي الوحيد يلي مسجل كل عمالو بالتأمينات الاجتماعية؟. يمكن الصناعي الوحيد يلي بيصرح عن ارباحو الحقيقيه وبيدفع الضرائب الحقيقيه المترتبه عليه؟. يمكن يكون الوحيد يلي مابيدفع اكراميات او رشاوي لأي موظف حكومي كان يزورو لأنو ماعندو اي مخالفه مضطر يرشي الموظف ليتغاضى عنها؟.

مابدي فوت بتفاصيل معاملة العمال يلي كان احن عليهم من اهاليهم؟. كان يساعد المحتاجين منهم ويعطيهم سلف للزواج او شراء اغراض للبيت ومكافآت للشغيله منهم!. بالمختصر كان بمثابة أب اكتر من رب عمل؟. توسع شغل ابو سامر نتيجة زيادة الطلب على انتاجه الممتاز واضطر ينقل المعمل لمنطقة الشيخ نجار الصناعية بعد التسهيلات يلي منحتها الحكومة للصناعيين فيها؟. الزلمه بنى معمل هونيك يكاد يكون فيلا اكتر من معمل من حيث الفخامه والاناقه والترتيب؟. بالمختصر كان هاد المعمل الجديد هو حلم حياة تحقق بالنسبه الو لذلك كان معظم وقتو فيه حتى العطلات كان يمضيها مع عيلتو فيه!.

بعد سيطرة الاوباش الهمج على المنطقه الصناعيه سكر المعمل وترك فيه بس الحارس وكان يتصل فيه باليوم عشرات المرات ليطمئن انو كل شي تمام؟. لكن هيهات ينجو حدا من شرهم وحقدهم؟. اقتحمو المعمل عصابه مسلحه ونزلو تفتيش بالمعمل حتى يبررو سرقتهم وصلو لقبو المعمل وشافو صوره قديمه لحافظ الأسد وكانت الكنز الثمين تبعهم؟. طلبو من الحارس يتصل بصاحب المعمل وحكو معو انو هو متهم بالتشبيح والدليل صورة حافظ الأسد وانو يتوجب عليه الحضور للمعمل وحلفان يمين على المصحف انو مو شبيح وبس؟. مابعرف ليش صدق وعودهم؟. يمكن من الخوف انو يروح المعمل يلي صرف فيه كل تحويشة العمر والرزق دونه الروح كما يقال؟. وهيك راح ابو سامر برجليه لعند الهمج الاوباش واعتقلوه وانقطعت اخبارو لليوم ويرجح انو قتلوه واتمنى يكون لأ ؟.

بعد تحرير المنطقه الصناعيه مريت على معملو وكان المنظر مأساوي فعلاً؟. باختصار المعمل رجع عالعظم حتى باب المعمل الحديد قلعوه وسرقوه.. تصورو انو المرمر قلعوه وسرقوه ماتركو ولاشي ابداً فيه؟. كل هاد مو مشكله كان ممكن يتعوض لكن متل ابو سامر مستحيل يتعوض؟…

(حجّي مارع)

حجي مارع هو لقب لقائد “لواء التوحيد” عبد القادر الصالح وهو أهم عنصر على الإطلاق قامت على اكتافه بداية المؤامره على سوريا!.

للمصداقيه لازم قول انو حجي مارع كان رجل وفي لمبادئه بغض النظر عن رأينا فيها؟. كان تاجر حبوب واحواله ميسوره لكن في بداية المؤامره على سوريا باع كل مايملك من اراضي وارزاق وحتى باع بيته يلي ساكن فيه وبقي ساكن فيه لكن صار يدفع الآجار للمالك الجديد وصرف كل مايملك على (الثوره)!. بعد مقتله بشهور حاول المالك الجديد إخلاء عائلته من البيت بس ماعندي فكره لوين انتهت الأمور؟.

الأموال يلي كان يستلمها من قطر وكانت تجي كاش بسيارات مصفحه عن طريق تركيا، كان يوزعها عالفصائل ويصرف منها على العائلات يلي قُتل معيليها بالحرب وامور تانيه تتعلق بإدارة المناطق يلي سيطر لواء التوحيد عليها!.

الصالح كان يحلم بدوله اسلاميه على الطريقه العمريه يسودها العدل والتسامح والمساواة والأمان!. حاول بالفعل انو يحقق هالشي بالمناطق الواسعه يلي سيطرو عليها بدءً من الأحياء الشرقيه لحلب انتهاءً بالحدود مع تركيا _ بالمناسبه سقوط معظم المناطق بيد الارهابيين كان بسبب خيانات من بعض الضباط والمسؤولين والحديث عن تفاصيلها يُدمي القلب_ !.

بعد احتلال المنطقه الصناعيه في الشيخ نجار حاول الصالح يعيد تشغيل المعامل يلي توقف معظمها وبعت اخبار لأصحابها المتواجد معظمهم بمناطق الدوله انو يطلعو لمعاملهم وهو ضامن لسلامتهم!. وبالفعل طلعو كتيرين وشغلٌو معاملهم، كان منهم اتنين أرمن تعرضو للاعتقال من جبهة النصره لكن الصالح حررهم بالقوه وقتها وأوصلهم لمعبر “بستان القصر” واعتذر منهم وطلب مايرجعو لهونيك لحتى يخلص من هالقصه؟.

حجي مارع عارض بشده دخول مقاتلين أجانب للمنطقه ورفض في البدايه التعامل معهم وتسهيل امورهم وحتى في بعض الأحيان كانت بعض الفصائل المنضويه بلواء التوحيد تشتبك مع النصره وداعش ويسقط قتلى وجرحى بينهم بالعشرات!. لكن القصه والمخطط لسوريا كان اكبر بكتير منو بل حتى أكبر من رؤساء دول بحالها؟!.

الصالح كان دائماً يروح لمدينة “كلٌس” بتركيا ويحضر اجتماعات فيها مع ضباط استخبارات من قطر وتركيا، آخر اجتماع راح عليه قبل اغتياله بيومين، وقتها طلبو الاجتماع فيه لوحده بدون مرافقين، ابو الوليد يلي جمعتني فيه صداقه وكان المسؤول عن المدينه الصناعيه وفيما بعد صار منسق أو ضابط ارتباط بين لواء التوحيد وباقي الفصائل الإرهابية من داعش والنصره وغيرهم، كان بالعاده يحضر الاجتماعات بتركيا إلا في المره الاخيره بناءً على طلب منهم يجتمعو مع الصالح لوحده!. ابو الوليد قال انو الحجي طلع من الاجتماع بعد تلات ساعات بوجه محتقن بالغضب واليأس وطلب من مساعديه يدعو قادة الفصائل لاجتماع في مدرسة المشاة بعد بكرا!.

في اليوم الموعود وكان بتاريخ 18/11/2013 تم اغتياله بقصف جوي اثناء الاجتماع!.

بعد حوالي اسبوعين من مقتل الصالح، كنت سهران مع ابو الوليد في بيته بمساكن هنانو، بعد ماعزٌيت بمقتل الحجي قلت انو كانت ضربه ظالمه من النظام أبصر مين وراها؟. وقتها صفن فيني ابو الوليد وقال:

_ من كل عقلك ابو عمر هي ضربه من النظام؟.

= جماعتكم هيك اصدرو بيان واتهمو النظام بالعمليه!.

_ شو بدك بجماعتنا يازلمه؟. مين بدك يتهمو مثلاً؟. راح احكيلك شلون صارت العمليه وانت بتحكم، الاجتماع كان في قبو بمدرسة المشاة مافيه الا شباكين للتهويه بتعرف شو معناها مدرسة المشاة؟._ الحقيقه انو مدرسة المشاة كانت منشأه عسكريه محصنه جداً ومبانيها مصنوعه من خراسانات ضخمه لايمكن تدميرها إلا بصواريخ معينه شديدة الإنفجار ورغم حصارها من الفصائل الإرهابية مده طويله لكن ماسقطت إلا بخيانة مديرها العميد الخائن آدم البنغلي_ وقت الاجتماع بيدخل صاروخ صغير أشبه بطلقه موجهه وبينفجر جنب الحجي بالذات، فهمت شي؟.

= لا والله ابو الوليد!!. قالو قصف بالبراميل المتفجره حسب البيان؟.

_ طيب راح صدق هالحكي، البراميل ماقتلت غير الحجي؟. اشو هالبرميل الرهيب هاد؟.

= خيو انا مابعرف بالتفاصيل يلي عم تحكيها بس ضيٌعتني ومافهمت شي؟.

_ ابو عمر الصاروخ كان عم يلاحق شريحه مزروعه بتياب الحجي او بالشنطه تبعو فهمت علي؟. هلق مين عندو هالتقنيه؟. النظام ابو براميل؟. خلصني يازلمه!!.

= اذا هيك صارت العمليه معناها هي شغلة طياره درون؟.

_ ياعيني عليك، مين عندو هيك مصيبه؟.

= مافي غير اميركا وإسرائيل ويمكن تركيا؟!.

_ خيو مابعرف اميركا تركيا حدا تاني مابعرف؟. ابو عمر هي الضربه معناها بح لواء التوحيد خلص شغلنا وبدهم يفرطونا، القصه كلها بدهم داعش والنصره تنتشر وتسيطر عالمنطقه كلها والحجي ماعم يتعاون معهم وكان ضد دخولهم بالأساس!. ياريت بس قدرت اجتمع معه بعد مارجعنا من تركيا كنت فهمت شي منه؟.

بعد مقتل حجي مارع تم اغتيال بعض قيادات اللواء وهرب كتير من عناصره لتركيا!. ابو الوليد تم اعتقاله من قبل داعش في المنطقه الصناعيه وعرفت بعد شهرين تقريباً انو مسجون بسجن “تادف” بمنطقة “الباب” وبعدين تغيرت خرائط السيطره وطلعت داعش من المنطقه كلها ومافي اي خبر عن ابو الوليد؟.

مشكلة حجي مارع متل مشكلة كتير معارضين للسلطه!. مفتكرين انو سوريا جزيره معزوله عن العالم ماكان ناقصها إلا سلطه نزيهه وشريفه وبنت عالم وناس ومنصير سويسريين منصنع ساعات ومراكب فضائيه!!. اليوم عندنا سلطه رغم كل مصايبها لكن حتماً ضد هيمنة الغرب وأميركا علينا ولازالت بخندق المقاومه ضد اسرائيل ثكنتهم العسكريه في منطقتنا ومع ذلك أيادي اميركا وإسرائيل عم تلعب بالبلد فمابالك لو سقط “هالنظام”؟.